आयकर विभागाकडून करदात्यांना व करसल्लागारांना मोठा दिलासा देण्यात आला आहे. मूल्यांकन वर्ष २०२५-२६ साठी (पूर्ववर्ष २०२४-२५) करआढावा अहवाल (Tax Audit Report) सादर करण्याची अंतिम तारीख ३० सप्टेंबरवरून वाढवून ३१ ऑक्टोबर अशी करण्यात आली आहे.

केंद्रीय प्रत्यक्ष कर मंडळाने (CBDT) जाहीर केलेल्या निवेदनानुसार, देशातील काही भागांमध्ये आलेल्या नैसर्गिक आपत्ती व पूरस्थितीमुळे करदाते व करसल्लागारांना वेळेत काम पूर्ण करण्यात अडचणी येत होत्या. या पार्श्वभूमीवर विविध व्यावसायिक संघटनांनी तसेच सनदी लेखापाल संस्थांनी सरकारकडे मुदतवाढीची मागणी केली होती. ही बाब काही उच्च न्यायालयातही उपस्थित करण्यात आली होती.

CBDT ने स्पष्ट केले आहे की आयकर ई-फायलिंग पोर्टल व्यवस्थित कार्यरत असून कोणत्याही तांत्रिक अडचणी नाहीत. २४ सप्टेंबर २०२५ पर्यंत ४.०२ लाख करआढावा अहवाल अपलोड झाले असून केवळ २४ सप्टेंबर रोजीच ६० हजारांहून अधिक अहवाल दाखल झाले. तसेच २३ सप्टेंबरपर्यंत ७.५७ कोटी आयटीआर भरले गेले आहेत.

तथापि, करसल्लागारांच्या मागणीचा व न्यायालयीन सुनावणींचा विचार करून करदात्यांना दिलासा देत ही मुदतवाढ जाहीर करण्यात आली आहे. या संदर्भातील औपचारिक अधिसूचना स्वतंत्रपणे प्रसिद्ध करण्यात येणार असल्याचे CBDT ने कळवले आहे.