इंदापूर तालुक्यातील वालचंदनगर पोलीसांनी शुक्रवारी (दि.७) पहाटे थरारक सिनेमासदृश कारवाई करत गांजाची वाहतूक करणाऱ्या आंतरराज्य टोळीचा पर्दाफाश केला आहे. पोलिसांनी १०० किलो (९९.९४ कि. ग्रॅ.) गांजा आणि होंडा सिटी कार असा एकूण २९ लाख ९८ हजार ५०० रुपयांचा मुद्देमाल जप्त केला असून, तीन आरोपींना अटक करण्यात आली आहे.

शुक्रवारी (दि. ७ नोव्हेंबर) पहाटे ५ वाजता वालचंदनगर पोलिसांना मिळालेल्या गोपनीय माहितीनुसार, बावडा–बारामती (बीकेबीएन) रस्त्याने गांजाची वाहतूक होत असल्याचे समजताच प्रभारी अधिकारी सहाय्यक पोलीस निरीक्षक राजकुमार डुणगे यांच्या मार्गदर्शनाखाली पथकाने सापळा रचला.

या दरम्यान, कळंब गावातील डी.पी. चौकात थरारक पाठलाग करून होंडा सिटी कार अडवण्यात आली. वाहनाची तपासणी करताना दोन गोण्यांमध्ये ९९.९४ किलो गांजा आढळून आला. या कारवाईत पोलिसांनी फिरोज अजिज बागवान (कसबा बारामती), प्रदीप बाळासो गायकवाड (मळद, बारामती) व मंगेश ज्ञानदेव राऊत (मळद, बारामती) यांना ताब्यात घेतले.

चौकशीदरम्यान त्यांनी कबुली दिली की ते हैदराबादहून गांजा आणून बारामतीत विक्रीसाठी आणत होते. त्यांच्यासोबत आणखी काही साथीदार असल्याची माहिती पोलिसांना मिळाली असून, फरारी आरोपी अशरफ अजिज सय्यद (निरावागज) याला नंतर अटक करण्यात आली आहे. या प्रकरणी वालचंदनगर पोलीस स्टेशनमध्ये गुंगीकारक औषधींद्रव्ये आणि मनोव्यापारांवर परिणाम करणारे पदार्थ अधिनियम कायद्यानुसार गुन्हा दाखल केला असून न्यायालयाने आरोपींना १२ नोव्हेंबरपर्यंत पोलीस कोठडी दिली आहे.

सदर कारवाई पुणे ग्रामीणचे पोलीस अधीक्षक संदीपसिंह गिल्ल, पुणे विभागाचे अपर पोलीस अधीक्षक रमेश चोपडे, बारामती विभागाचे अपर पोलीस अधीक्षक गणेश बिरादार, बारामतीचे उपविभागीय पोलीस अधिकारी डॉ. सुर्दशन राठोड यांच्या मार्गदर्शनाखाली पार पडली.

या कारवाईत सहाय्यक पोलीस निरीक्षक राजकुमार डुणगे, पोलीस हवालदार गणेश काटकर, उत्तम खाडे, शैलेश स्वामी, गुलाबराव पाटील, किसन बेलदार, सचिन गायकवाड, शरद पोफळे, महेश पवार व इतर पोलिस कर्मचाऱ्यांनी सहभाग घेतला होता.