महिलांना कौशल्याधारित प्रशिक्षण देऊन आर्थिकदृष्ट्या सक्षम आणि स्वावलंबी बनविण्याच्या उद्देशाने शरयू फाउंडेशनच्या माध्यमातून पिंपळी-लिमटेक येथे महिला व युवतींसाठी २१ दिवसीय मोफत आरी वर्क प्रशिक्षणाचे आयोजन करण्यात आले आहे. शरयूच्या अध्यक्षा शर्मिला पवार आणि युवा नेते युगेंद्र पवार यांच्या पुढाकारातून हा उपक्रम राबविण्यात येत असून पिंपळी ग्रामपंचायत सभागृहात प्रशिक्षणाला उत्साहात सुरुवात झाली.

या प्रशिक्षणामध्ये साडी, ब्लाऊज तसेच विविध कापडांवरील हस्तकला, विनकाम आणि डिझाईन कौशल्याचे मार्गदर्शन महिलांना दिले जात आहे. पिंपळी गावच्या सीआरपी व माजी उपसरपंच अश्विनी सुनिल बनसोडे यांच्या विशेष प्रयत्नातून गावातील अनेक महिला आणि युवती या प्रशिक्षणात सहभागी झाल्या आहेत.

प्रशिक्षणाचा शुभारंभ पिंपळी गावच्या माजी सरपंच व विद्यमान सदस्या मंगल हरिभाऊ केसकर, ग्रामपंचायत सदस्या मीनाक्षी अशोकराव देवकाते पाटील, माजी सरपंच अंजना जनार्दन खोमणे आणि माजी उपसरपंच अश्विनी सुनिल बनसोडे यांच्या हस्ते शरयू फाउंडेशनच्या आरी वर्क प्रशिक्षक नम्रता धुमाळ यांचा सत्कार करून करण्यात आला.

शरयूच्या अध्यक्षा शर्मिला पवार यांनी सांगितले की, बारामती तालुका व शहरातील सर्व गावांमध्ये आणि प्रभागांमध्ये महिला बचत गटातील महिला, होतकरू युवती आणि स्थानिक महिलांसाठी मोफत आरी वर्क प्रशिक्षणाचे आयोजन करण्यात येणार आहे. महिलांनी प्रशिक्षण घेऊन स्वतःचा व्यवसाय सुरू करून स्वावलंबी व्हावे, हा या उपक्रमामागील मुख्य उद्देश असल्याचे त्यांनी स्पष्ट केले.

या प्रशिक्षणामुळे महिला खादी उद्योग, हातमाग उद्योग तसेच विविध महामंडळांच्या योजनांचा लाभ घेऊन कुटीर उद्योग अथवा लघुउद्योग उभारू शकतात, असे मत सीआरपी अश्विनी सुनिल बनसोडे यांनी व्यक्त केले.

या उपक्रमाला पिंपळी-लिमटेक परिसरातील महिलांचा मोठा प्रतिसाद मिळाला असून महिलांनी शर्मिला पवार, युगेंद्र पवार तसेच प्रशिक्षणासाठी विशेष प्रयत्न करणाऱ्या अश्विनी बनसोडे आणि मीनाक्षी देवकाते यांचे आभार मानले.

यावेळी मंगल केसकर, अश्विनी बनसोडे, मीनाक्षी देवकाते पाटील, अंजना खोमणे, ग्रामपंचायत संगणक ऑपरेटर प्रसन्ना थोरात, प्रशिक्षक नम्रता धुमाळ तसेच बचत गटातील महिला-भगिनी आणि युवती मोठ्या संख्येने उपस्थित होत्या.