विद्या प्रतिष्ठान कला, विज्ञान व वाणिज्य महाविद्यालय, बारामती आणि क्विक हील फाउंडेशन यांच्या संयुक्त विद्यमाने राबविण्यात येत असलेल्या ‘सायबर शिक्षा फॉर सायबर सुरक्षा’ या उपक्रमांतर्गत बारामती येथील एका शाळेत विशेष सायबर जनजागृती कार्यक्रम घेण्यात आला.

या उपक्रमांतर्गत पूर्वा चव्हाण आणि विनया लाखे या विद्यार्थिनींनी शाळेतील विद्यार्थ्यांना सायबर सुरक्षेबाबत मार्गदर्शन केले. इंटरनेट आणि डिजिटल माध्यमांच्या वाढत्या वापरामुळे सायबर गुन्ह्यांचे प्रमाण वाढत असून, त्यापासून सुरक्षित राहण्यासाठी आवश्यक असलेल्या विविध उपाययोजनांची माहिती विद्यार्थ्यांना देण्यात आली.

यावेळी सुरक्षित संकेतशब्दांचा वापर, अनोळखी लिंक वर क्लिक न करणे, ओटीपी व वैयक्तिक माहिती कोणासोबतही शेअर न करणे, सोशल मीडियावरील गोपनीयतेचे संरक्षण तसेच ऑनलाइन फसवणुकीपासून सावध राहणे यांसारख्या महत्त्वाच्या विषयांवर मार्गदर्शन करण्यात आले.

सायबर फसवणुकीचे विविध प्रकार उदाहरणांसह समजावून सांगत विद्यार्थ्यांना डिजिटल व्यवहार करताना कोणती काळजी घ्यावी, याचे प्रात्यक्षिकही दाखविण्यात आले. डिजिटल युगात सायबर सुरक्षा ही प्रत्येकाची जबाबदारी असून, योग्य माहिती आणि सतर्कता यांच्या माध्यमातून अनेक सायबर फसवणुका टाळता येऊ शकतात, असा संदेश यावेळी देण्यात आला.

या जनजागृती कार्यक्रमाला शाळेतील विद्यार्थ्यांचा उत्स्फूर्त प्रतिसाद मिळाला. विद्यार्थ्यांनी सायबर सुरक्षेविषयी विविध प्रश्न विचारून उत्सुकता व्यक्त केली.

‘सायबर शिक्षा फॉर सायबर सुरक्षा’ उपक्रमांतर्गत राबविण्यात आलेला हा जनजागृती कार्यक्रम यशस्वी ठरला असून, विद्यार्थ्यांच्या माध्यमातून समाजात डिजिटल सुरक्षिततेबाबत जागरूकता निर्माण करण्याचा हा उपक्रम महत्त्वपूर्ण ठरत आहे.