वडगाव निंबाळकर पोलीस स्टेशन हद्दीतील वाघळवाडी व वाणेवाडी परिसरात शेतकऱ्यांचे शेळी-बोकड चोरीला गेल्याच्या तक्रारीनंतर पोलिसांनी जलद हालचाल करत सराईत चोरट्यांच्या टोळीचा पर्दाफाश केला आहे. या कारवाईत तब्बल १२ लाख ९५ हजार ८५० रुपये किंमतीचा मुद्देमाल जप्त करण्यात आला आहे.

वरिष्ठ पोलीस अधिकाऱ्यांच्या आदेशानुसार सहाय्यक पोलीस निरीक्षक नागनाथ पाटील यांनी तात्काळ तपास पथक नेमले. पोलीस उपनिरीक्षक राहुल साबळे व गुन्हे शोध पथकाने सीसीटीव्ही फुटेज, तांत्रिक विश्लेषण व गोपनीय माहितीच्या आधारे शिरवळ (ता. खंडाळा, जि. सातारा) येथील आरोपी अशोक बाबुराव जाधव (वय ५५) याच्या गोठ्यावर छापा टाकला.

छाप्यात गुन्ह्यात वापरलेली पिकअप गाडी, तसेच पुणे जिल्ह्यातील बारामती, जेजुरी आणि सातारा जिल्ह्यातील खंडाळा-फलटण परिसरातून चोरीस नेलेल्या एकूण ३२ शेळ्या, १० बोकड व ४ लहान पिल्ले मिळून आली. तक्रारदारांनी घटनास्थळीच आपल्या पशुधनाची ओळख पटविल्यानंतर दोन पंचांच्या उपस्थितीत सविस्तर पंचनामा करून मुद्देमाल जप्त करण्यात आला.

आरोपीकडून चौकशीदरम्यान सदर गुन्हा अटक आरोपी, एक विधीसंघर्षग्रस्त बालक व फरारी आरोपी प्रकाश अशोक जाधव, मयूर अशोक जाधव (रा. शिरवळ) तसेच निलेश (रा. वाकड, पुणे) यांनी मिळून केल्याचे निष्पन्न झाले. फरारी आरोपी हे सराईत व तडीपार गुन्हेगार असल्याची माहिती पोलिसांनी दिली.

पिकअप गाडीची झडती घेतली असता २ तलवारी, ३ कोयते, लोखंडी रॉड, स्क्रू ड्रायव्हर, तार कटर, चाकू, लाकडी काठी व प्लास्टिक पाईप असा घातक शस्त्रसाठा आढळून आला. आरोपीकडून जप्त करण्यात आलेल्या एकूण मुद्देमालाची किंमत १२ लाख ९५ हजार एवढी आहे.

या प्रकरणात आरोपींवर वडगाव निंबाळकर, लोणंद व हडपसर पोलीस स्टेशनमध्ये दाखल असलेल्या अनेक गुन्ह्यांचा उलगडा झाला असून पुढील तपासात आणखी गुन्हे उघडकीस येण्याची शक्यता पोलिसांनी व्यक्त केली आहे. अटक आरोपीस न्यायालयाने १ दिवसाची पोलीस कोठडी मंजूर केली आहे. सदर गुन्ह्याचा पुढील तपास पोलीस हवालदार रमेश नागटिळक करत आहेत.

ही कामगिरी पोलिस अधीक्षक संदीप सिंह गिल्ल, अप्पर अधीक्षक गणेश बिरादार, उपविभागीय पोलिस अधिकारी सुदर्शन राठोड, गुन्हे शाखेचे पोलिस निरीक्षक अविनाश शिळीमकर यांच्या मार्गदर्शनाली सहायक पोलिस निरीक्षक नागनाथ पाटील, उपनिरीक्षक राहुल साबळे, दीपक वारुळे, रमेश नागटिळक, पोपट नाळे, अमोल भोसले, अनिल खेडेकर, हृदयनाथ देवकर, महेश पन्हाळे, सादिक इनामदार, कुंडलिक कडवळे, सागर चौधरी, तौफिक मणेरी, भाऊसाहेब मारकड, आबा जाधव, धनंजय भोसले, नरेंद्र यादव, विलास ओमासे, सूरज धोत्रे, नागनाथ परगे, विकास येटाळे, भानुदास सरक यांच्या पथकने केली.